റിലയൻസ് ജിയോയും വൺപ്ലസും ഒത്തൊരുമിക്കുന്നു

രാജ്യത്തെ ഏറ്റവും വലിയ ഡിജിറ്റൽ സേവന ദാതാവായ റിലയൻസ് ജിയോയും അത്യാധുനിക സാങ്കേതികവിദ്യയിൽ മുൻനിരയിലുള്ള ചൈനീസ് ബ്രാൻഡായ വൺപ്ലസും ഒത്തൊരുമിക്കുന്നു. 5ജി സാങ്കേതികവിദ്യയിലൂടെ തുറക്കപ്പെടുന്ന മുഴുവൻ സാധ്യതകൾ ഉപയോഗപ്പെടുത്തുന്നതിനും 5ജിയിൽ അന്തർലീനമായിട്ടുള്ള ശേഷി പൂർണമായി പ്രയോജനപ്പെടുത്തുന്നതിനും ലക്ഷ്യമിട്ടുള്ള തന്ത്രപരമായ സഹകരണമാണ് ഇരു കമ്പനികളും ചേർന്നു പ്രഖ്യാപിച്ചത്.

 

ടെലികോം മേഖലയുമായി ബന്ധപ്പെട്ട രണ്ട് വമ്പൻ ബ്രാൻഡുകൾ കൈകോർക്കുന്നതിലൂടെ ഉപയോക്താക്കൾക്ക് മികച്ച 5ജി സേവനം ലഭിക്കും എന്നതാണ് ഗുണഫലം. രാജ്യത്തെ 5ജി ശൃംഖല ശക്തമാക്കുന്നതിനായി റിലയൻസ് ജിയോയുടെയും വൺപ്ലസിന്റെയും സാങ്കേതികവിദ്യാ അടിസ്ഥാന സൗകര്യങ്ങൾ സംയോജിപ്പിക്കും. ഇതിലൂടെ ഉപയോക്താക്കൾക്ക് 5ജിയുടെ പുതിയ അനുഭവം ലഭ്യമാക്കാൻ കഴിയുമെന്നാണ് പ്രതീക്ഷിക്കുന്നത്.

രാജ്യമെമ്പാടുമുള്ള വൺപ്ലസിനും ജിയോ ട്രൂ 5ജി ഉപയോക്താക്കൾക്കും കൂടുതൽ മികച്ച നെറ്റ്‌‍വർക്ക് അനുഭവം പകർന്നു നൽകാനാണ് ഇരു കമ്പനികളും തമ്മിലുള്ള സഹകരണത്തിലൂടെ ലക്ഷ്യമിടുന്നത്. ഈ കൂട്ടുകെട്ട് ശക്തിപ്പെടുത്തുന്നതിനും സേവനം മികവുറ്റതാക്കുന്നതിനും വേണ്ടി, വൺപ്ലസും ജിയോയും ചേർന്ന് അത്യാധുനിക 5ജി ഇന്നോവേഷൻ ലാബ് നിർമിക്കുമെന്നും പ്രഖ്യാപിച്ചു. അതായത് പുതിയ ഫീച്ചറുകൾ വികസിസിപ്പിക്കുന്നതിലും 5ജി സേവനങ്ങളിൽ വിപ്ലവകരമായ മാറ്റം സൃഷ്ടിക്കുന്നതിലും ഇതു ഉപയോക്താക്കളിലേക്ക് അതിവേഗം എത്തിക്കുന്നതിനുമായാണ് സഹകരണം ഉന്നമിടുന്നതെന്ന് സാരം

 

"കഴിയുന്നവിധം അതിർവരമ്പുകൾ എല്ലാം ഭേദിക്കുന്നതിൽ ഞങ്ങൾ വിശ്വസിക്കുന്നു. ജിയോയുമായുള്ള പുതിയ പങ്കാളിത്തം ഈ പ്രതിബദ്ധതയുടെ തെളിവാണ്. ഇരു കമ്പനികളുടെയും പങ്കാളിത്തം കണക്റ്റിവിറ്റിയുടെ ഭാവിയിലേക്കുള്ള ഒരു ശക്തമായ ചുവടുവെപ്പിനെ സൂചിപ്പിക്കുന്നു. ജിയോയും വൺപ്ലസ് ഇന്ത്യയും ഒരുമിച്ച് രാജ്യത്തെ 5ജി മേഖലയെ മാറ്റിമറിക്കുമെന്നും ഉപയോക്താക്കൾക്ക് മികച്ച സേവനം ലഭ്യമാക്കും,” വൺപ്ലസ് ഇന്ത്യയുടെ വക്താവ് പറഞ്ഞു.

"ഇന്ത്യയിലെ ഏറ്റവും മികച്ച 5ജി ശൃംഖലയാണ് ജിയോ ട്രൂ 5ജി. ശക്തമായ 5ജി ശൃംഖലയിലൂടെ രാജ്യം മുഴുവൻ മികച്ച കവറേജാണ് ജിയോ ട്രൂ 5ജി നൽകുന്നത്. രാജ്യത്തെ നിലവിലുള്ള 5ജി വിന്യാസത്തിന്റെ 85 ശതമാനവും ജിയോയാണ് നിർമിച്ചിരിക്കുന്നത്. ഞങ്ങളുടെ ഉപയോക്താക്കൾക്ക് നവീനമായ. 5ജി സേവനം പരിചയപ്പെടുത്താനുള്ള സമയമാണിത്. വൺപ്ലസ് ഇന്ത്യയുമായുള്ള പങ്കാളിത്തം ആ ദിശയിലേക്കുള്ള ഒരു ചുവടുവെയ്പ്പാണ്. അടുത്ത കുറച്ചു മാസങ്ങൾക്കകം തന്നെ, ഞങ്ങളുടെ ഉപയോക്താക്കൾക്ക് മികച്ചതും നിലവാരം മെച്ചപ്പെടുത്തിയതുമായ ഗെയിമിങ്, സ്ട്രീമിങ്, 5ജിയുടെ പുത്തൻ ഉപയോഗ അനുഭവം മനസിലാക്കാൻ കഴിയും," ജിയോ വക്താവ് പറഞ്ഞു.