6ജി നെറ്റ്‌വർക്ക് വികസിപ്പിക്കുന്ന ലോകത്തിലെ തന്നെ ആദ്യത്തെ കമ്പനിയായി ജിയോ

5ജി സാങ്കേതിക വിദ്യയിൽ അല്ല 6ജിയിൽ ജിയോ ലോകത്ത് തന്നെ ഒന്നാമതെത്തും എന്ന് വാർഷിക പൊതുയോഗത്തിൽ പ്രഖ്യാപിച്ച് റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി. റിലയൻസ് ഇൻഡസ്ട്രീസിന്റെ 46-ാമത് വാർഷിക പൊതുയോഗത്തിൽ ആണ് മുകേഷ് അംബാനി പ്രധാന പ്രഖ്യാപനം നടത്തിയത്. ജിയോ പ്ലാറ്റ്‌ഫോമുകൾ ആഗോള തലത്തിൽ 6ജി വികസിപ്പിക്കുന്നതിൽ ഇപ്പോൾ തന്നെ മുൻപന്തിയിലാണെന്ന് അദ്ദേഹം വ്യക്തമാക്കി. 6ജി നെറ്റ്‌വർക്ക് വികസിപ്പിക്കുന്ന ലോകത്തിലെ തന്നെ ആദ്യത്തെ കമ്പനിയായി ജിയോ മാറുമെന്നായിരുന്നു പ്രഖ്യാപനം.

 

ഒരു ടെലികമ്മ്യൂണിക്കേഷൻ ഓപ്പറേറ്റർ എന്ന നിലയിൽ ഇന്ത്യയിൽ ജിയോയുടെ പരിവർത്തനം പ്രത്യേകമായി പരാമർശിക്കുകയായിരുന്നു അംബാനി. ജിയോ പ്ലാറ്റ്‌ഫോമിലെ നൂതന ഉത്പന്നങ്ങൾ അന്താരാഷ്ട്ര വിപണികളിലേക്ക് കയറ്റുമതി ചെയ്യാനും സേവനം ലോകമെമ്പാടും വ്യാപിപ്പിക്കാനും ആഗ്രഹിക്കുന്നതായി അംബാനി വ്യക്തമാക്കി.
നെറ്റ്‌വർക്കിങ്, അത്യാധുനിക ആർട്ടിഫിഷ്യൽ ഇന്റലിജൻസ്,മെഷീൻ ലേണിങ് ശേഷി തുടങ്ങിയ അത്യാധുനിക സാങ്കേതികവിദ്യകൾ ഉൾക്കൊള്ളിച്ചാണ് കമ്പനി 5ജി വിപുലീകരിച്ചിരിക്കുന്നതെന്ന് അംബാനി വെളിപ്പെടുത്തി. വിവിധ ആഗോള കമ്പനികളിൽ നിന്നുള്ള 5ജിഉപകരണങ്ങളുമായി നെറ്റ്‍വർക്ക് സംയോജിപ്പിക്കാനാകും.

 

ഇന്ത്യയിലുടനീളം 5ജി നെറ്റ്‌വർക്കുകൾ നടപ്പിലാക്കുന്നതിനായി നോക്കിയ, എറിക്‌സൺ, സാംസങ് തുടങ്ങിയ പ്രമുഖ കമ്പനികളുമായി ജിയോ സഹകരിച്ചിട്ടുണ്ട്. ജിയോ 5ജി റേഡിയോ പോർട്ട്‌ഫോളിയോ കോം‌പാക്റ്റ് സെല്ലുകൾ മുതൽ വലിയ ടവർ അധിഷ്‌ഠിത റേഡിയോകൾ വരെയുള്ള വൈവിധ്യമാർന്ന ഉൽപ്പന്നങ്ങൾ വികസിപ്പിക്കുന്നു. വിവിധതരം ഔട്ട്‌ഡോർ, ഇൻഡോർ 5ജി ആവശ്യങ്ങളും നിറവേറ്റുന്നു.
ജിയോ 5ജി വേഗത്തിൽ വിന്യസിക്കുന്നതിൻെറ പുരോഗതിയും അംബാനി വ്യക്തമാക്കി. ഒക്ടോബറിൽ ആരംഭിച്ച് വെറും ഒമ്പത് മാസത്തിനുള്ളിൽ, രാജ്യത്തെ 96 ശതമാനം പ്രധാന നഗരങ്ങളെയും ഉൾക്കൊള്ളുന്നതിനായി ജിയോ 5ജി കവറേജ് വിപുലീകരിച്ചിട്ടുണ്ട്. ഡിസംബറോടെ രാജ്യവ്യാപകമായി സമ്പൂർണ്ണ കവറേജ് നേടുമെന്നാണ് പുതിയ പ്രഖ്യാപനം. ആഗോളതലത്തിൽ തന്നെ ഏറ്റവും വേഗതയേറിയ 5ജി സേവനങ്ങളിൽ ഒന്നാണ് ജിയോയുടേതെന്ന് അദ്ദേഹം പറഞ്ഞു. ജിയോ 5ജി പ്ലാനുകൾ കുറഞ്ഞ വിലയിൽ ലഭ്യമാക്കുമെന്ന് പ്രഖ്യാപിച്ചിരുന്നെങ്കിലും വാർഷിക പൊതുയോഗത്തിൽ ഇതുമായി ബന്ധപ്പെട്ട സൂചനകൾ ഒന്നും ഉണ്ടായില്ല. കൂടാതെ, ഇന്ത്യൻ ഉപയോക്താക്കൾക്കായി ചാറ്റ്ജിപിടിക്ക് സമാനമായ പുതിയ എഐ സംവിധാനം വികസിപ്പിക്കുമെന്നും അംബാനി വ്യക്തമാക്കി.

5ജി യുമായി താരതമ്യപ്പെടുത്തുമ്പോൾ ഉയർന്ന ഡാറ്റാ നൽകാൻ 6ജി ലക്ഷ്യമിടുന്നു. ഇത് സെക്കൻഡിൽ തന്നെ ടെറാബിറ്റ് ഡാറ്റ സ്റ്റോറേജ് സാധ്യമാക്കും. വേഗത്തിലുള്ള ഡൗൺലോഡുകൾ, സ്ട്രീമിങ് എന്നിവ കൂടാതെ ഡാറ്റ-ഇൻറൻസീവ് ആപ്ലിക്കേഷനുകൾ വേഗത്തിൽ പ്രവർത്തനക്ഷമമാക്കും. ആശയവിനിമയത്തിലെ കാലതാമസം 6ജി മൈക്രോസെക്കൻഡുകളായി കുറയ്ക്കും. റിമോട്ട് സർജറി, ഡ്രൈവർ ഇല്ലാ വാഹനങ്ങൾ, ഓഗ്മെന്റഡ് റിയാലിറ്റി തുടങ്ങിയ തത്സമയ ഇടപെടൽ ആവശ്യമുള്ള ആപ്ലിക്കേഷനുകൾക്ക് എല്ലാം ഇത് നിർണായകമാകും.