ടെസ്ല ഇന്ത്യയിലേക്ക് എത്തുന്നത് ഏറെ നാളായുള്ള വാ‍ർത്തയാണ്. എന്നാൽ പല കാരണങ്ങൾ കൊണ്ടും ഇതു മുടങ്ങി. യുഎസിൽ എത്തിയ പ്രധാനമന്ത്രി നരേന്ദ്ര മോദി ടെസ്ല സിഇഒ ഇലോൺ മസ്ക് ഉൾപ്പെടെ വിവിധ മേഖലകളിൽ നിന്നുള്ള പ്രമുഖരായ ചൊവ്വാഴ്ച കൂടിക്കാഴ്ച നടത്തിയിരുന്നു. മറ്റേതൊരു രാജ്യത്തേക്കാളും ഇന്ത്യക്ക് കൂടുതൽ സാധ്യതകളുണ്ടെന്നും രാജ്യത്തിൻെറ ഭാവിയിൽ വിശ്വസിക്കുന്നതായും ഇലോൺ മസ്ക് പറഞ്ഞു. ട്വിറ്ററിന് ഓരോ രാജ്യത്തെയും ഭരണകൂടത്തെ പിന്തുടരുകയല്ലാതെ മറ്റ് മാർഗമില്ലെന്ന് മസ്ക് വ്യക്തമാക്കി. അല്ലെങ്കിൽ കമ്പനി അടച്ച് പൂട്ടേണ്ടി വരും. കമ്പനിയുടെ മുൻ ഉടമയും സിഇഒയുമായ ജാക്ക് ഡോർസി ഇന്ത്യൻ സർക്കാരിനെതിരെ അടുത്തിടെ ആരോപണം ഉന്നയിച്ചിരുന്നു. വ്യത്യസ്ത സർക്കാരുകൾക്ക് വ്യത്യസ്തമായ നിയമങ്ങളും നിയന്ത്രണങ്ങളും ഉണ്ട്. അത് അനുസരിക്കാൻ തയ്യാറാണെന്ന് മസ്ക് വ്യക്തമാക്കി.
ടെസ്ല ഇന്ത്യൻ വിപണിയിൽ ഉടൻ എത്തുമോ എന്ന ചോദ്യത്തിന് അടുത്ത വർഷം രാജ്യം സന്ദർശിക്കാൻ പദ്ധതിയിടുന്നുണ്ടെന്ന് മസ്ക് മസ്ക് മാധ്യമ പ്രവർത്തകരോട് പറഞ്ഞു. ടെസ്ല ഇന്ത്യയിലെത്തിക്കാൻ കഴിയുന്നത്ര വേഗം ശ്രമിക്കുമെന്നായിരുന്നു പ്രതികരണം. പ്രധാനമന്ത്രിയുടെ പിന്തുണയ്‌ക്ക് നന്ദി പറഞ്ഞ മസ്ക് പെട്ടെന്ന് ഇന്ത്യൻ വിപണിയിലേക്ക് എടുത്ത് ചാടാനില്ലെന്നും സാധ്യതകൾ മനസിലാക്കുന്നുണ്ടെന്നും കൂട്ടിച്ചേർത്തു. ഇന്ത്യയുമായുള്ള ബന്ധത്തിൽ ഒരു സുപ്രധാന നിക്ഷേപമായിരിക്കും ടെസ്ല നടത്തുന്നതെന്ന് വ്യക്തമാക്കിയ മസ്ക് ഒരു സന്ദർഭത്തിൽ മോദിയെ അഭിനന്ദിക്കാനും മടിച്ചില്ല. ''ഇന്ത്യയിൽ കാര്യമായ നിക്ഷേപം നടത്താൻ വ്യവസായ പ്രമുഖരെ പിന്തുടരുന്ന മോദി രാജ്യത്തെക്കുറിച്ച് കരുതലുള്ളയാളാണ്. ഞാൻ അദ്ദേഹത്തിൻെറ ആരാധകനാണ്.''മസ്ക് പറയുന്നു.
സൗരോർജ്ജ മേഖലയിൽ നിക്ഷേപം നടത്താൻ ഇന്ത്യ മികച്ച രാജ്യമാണെന്നും മസ്ക് ചൂണ്ടിക്കാട്ടി. പ്രധാനമന്ത്രിയുമായുള്ള ചർച്ച മികച്ചതായിരുന്നെന്ന് മസ്ക് കൂട്ടിച്ചേർത്തു. യുഎസ് പ്രസിഡൻറ് ജോ ബൈഡൻെറയും പ്രഥമ വനിത ജിൽ ബൈഡൻെറയും ക്ഷണപ്രകാരം ജൂൺ 21 മുതൽ 24 വരെയാണ് പ്രധാനമന്ത്രി യുഎസ് സന്ദർശിക്കുന്നത്. നൊബേൽ സമ്മാന ജേതാക്കൾ, സാമ്പത്തിക വിദഗ്ധർ, കലാകാരന്മാർ, ശാസ്ത്രജ്ഞർ, പണ്ഡിതർ തുടങ്ങി വിവിധ മേഖലകളിൽ നിന്നുള്ളവരുമായി പ്രധാനമന്ത്രി കൂടിക്കാഴ്ച നടത്തും. സംരംഭകരും, അക്കാദമിക് വിദഗ്ധരും, ആരോഗ്യ മേഖലയിലെ വിദഗ്ധരും ഇക്കൂട്ടത്തിലുണ്ട്.
Post your comments