സീ എൻറർടെയ്ൻറ്മൻറിനെതിരെ വീണ്ടും സെബി

 

സീ എൻറർടൈൻമെൻറ് പ്രൊമോട്ടർമാർക്കെതിരെ അടിയന്തര നടപടി വേണമെന്ന് സെബി. സോണി- സീ ലയനത്തിൻെറ പേരിൽ പൊതുജനങ്ങളുടെ പണം വകമാറ്റിയെന്നാണ് ആരോപണം. മാനേജ്‌മെന്റിനെയും നിക്ഷേപകരെയും മറ്റ് പങ്കാളികളെയും സംരക്ഷിക്കുന്നതിനായി ആണ് നടപടി വേണമെന്ന സെബി ആവശ്യപ്പെടുന്നത്. ഫണ്ട് വക മാറ്റിയതിൽ പ്രൊമോട്ടർമാർക്കെതിരെ അടിയന്തര നടപടി വേണമെന്ന് സെക്യൂരിറ്റീസ് ആൻഡ് അപ്പലേറ്റ് ട്രൈബ്യൂണലിന് (എസ്എടി) സെബി നൽകിയ മറുപടിയിൽ ആവശ്യപ്പെടുന്നു. നിയമലംഘനങ്ങൾ മാത്രമല്ല, ഒന്നിലധികം തെറ്റായ വെളിപ്പെടുത്തലുകൾ കമ്പനി നടത്തിയിട്ടുണ്ടെന്നും പ്രസ്താവനകൾ സമർപ്പിച്ചിട്ടുണ്ടെന്നും സെബി കൂട്ടിച്ചേർത്തു.

കമ്പനിയുടെ ചെയർമാനും മാനേജിംഗ് ഡയറക്ടറും സിഇഒയുമായ പുനിത് ഗോയങ്ക നിരവധി വ്യത്യസ്ത സ്കീമുകളിലും ഇടപാടുകളിലും ഏർപ്പെട്ടിട്ടുണ്ട്.ലിസ്റ്റഡ് കമ്പനികളിലൂടെ സമാഹരിക്കുന്ന പൊതുജനങ്ങളുടെ വലിയ തുക പലകാര്യങ്ങൾക്കായി വഴിതിരിച്ചുവിടുന്നു. ഈ വ്യക്തികളുടെ ഉടമസ്ഥതയിലുള്ളതും ഇവർ നിയന്ത്രിക്കുന്നതുമായ സ്വകാര്യ സ്ഥാപനങ്ങളിലേക്കാണ് പണം വകമാറ്റുന്നത്. സെബി പറയുന്നു. അതേസമയം സെബിയുടെ തുടർച്ചയായ നടപടികൾ ഓഹരി ഉടമകൾക്കിടയിൽ മുൻവിധി സൃഷ്ടിക്കുകയും സോണിയുമായുള്ള ലയന പ്രക്രിയയെ ബാധിക്കുകയും ചെയ്യും എന്ന് കാണിച്ച് സീ എന്റർടൈൻമെന്റ് എന്റർപ്രൈസസ് അധികൃതർ സെബിക്ക് കത്തെഴുതി. സീ എന്റർടൈൻമെന്റ് , സോണി പിക്‌ചേഴ്‌സ് നെറ്റ്‌വർക്ക്സ് ഇന്ത്യ പ്രൈവറ്റ് ലിമിറ്റഡ് എന്നിവയുടെ ലയന‌ പദ്ധതിക്ക് സെബി നോ എൻഒസി നൽകിയിട്ടുണ്ട്. ഇത് മീഡിയ വ്യവസായത്തിലെ രണ്ട് കമ്പനികളുടെ ഏറ്റവും വലിയ ലയനം കൂടെയാണ്. ലയനം പൂർത്തിയാകുന്നതോടെ ഇന്ത്യയിലേക്ക് 170 കോടി ഡോളറിന്റെ നേരിട്ടുള്ള വിദേശ നിക്ഷേപം എത്തും എന്നാണ് കണക്കാക്കുന്നത്. ലയന പദ്ധതിക്ക് 99.9 ശതമാനം അംഗീകാരം ലഭിച്ചിട്ടുണ്ടെന്നും സീ എന്റ‍ർടെയ്ന്റ്മന്റ് വ്യക്തമാക്കി.

സോണി പിക്ചേഴ്സ് നെറ്റ്‌വർക്ക് ഇന്ത്യ പ്രൈവറ്റ് ലിമിറ്റഡുമായി സീ എൻറര്‍ടെയ്ൻറ്മൻറ് ലയന കരാർ ഒപ്പിട്ടിട്ടുണ്ടെങ്കിലും ലയന നടപടികൾ ഇതുവരെ പൂർത്തിയായിട്ടില്ല.‌ ലയനം പൂർത്തിയായാൽ സോണി ഇന്ത്യക്കായിരിക്കും സീ എന്റർടൈൻമെൻിൽ ഭൂരിപക്ഷ ഓഹരികൾ. 52.93 ശതമാനം ഓഹരികളായിരിക്കും കമ്പനിയുടെ കൈവശം ഉണ്ടാകുക. സീ പുതിയ സ്ഥാപനത്തിൻെറ 47.07 ശതമാനം ഓഹരികളാണ് കൈവശം വയ്ക്കുക എന്നാണ് റിപ്പോ‍ട്ടുകൾ. ഇപ്പോൾ സെബി ഉന്നയിക്കുന്ന ആരോപണങ്ങൾ ഏകദേശം നാല് വർഷം മുമ്പുള്ള ഒരു വിഷയത്തിലെ പുനരന്വേഷണവുമായി ബന്ധപ്പെട്ടാണെന്നാണ് സീ എൻറർടെയ്ൻറ്മൻറ് വിശദീകരണം.