ആർട്ടിഫിഷ്യൽ ഇൻറലിജൻസ് വ്യാപകമായതോടെ വിവിധ മേഖലകളിൽ ആധിപത്യം സ്ഥാപിക്കാനും ചെലവുചുരുക്കാനുമൊക്കെ എഐയുടെ കൂട്ടുപിടിക്കാൻ ഒരുങ്ങുകയാണ് വൻകിട കമ്പനികൾ. അടുത്ത മൂന്ന് വർഷത്തിനുള്ളിൽ വൻകിട ഐടി കമ്പനിയായ ആക്സഞ്ചർ എഐക്കായി നിക്ഷേപിക്കുന്നത് 300 കോടി ഡോളർ. എഐ മേഖലയിൽ പ്രവർത്തിക്കുന്ന കൂടുതൽ കമ്പനികൾ ഏറ്റെടുക്കാനും ഏറ്റവും പുതിയ സാങ്കേതികവിദ്യകൾ ഉപയോഗിച്ച് കൂടുതൽ ജീവനക്കാരെ പരിശീലിപ്പിക്കാനുമാണ് കമ്പനി പദ്ധതിയിടുന്നത്. ഡാറ്റ രംഗത്തുൾപ്പെടെ കൂടുതൽ തുക നിക്ഷേപിക്കും. ഐടി കൺസൾട്ടിംഗ് സ്ഥാപനം ജീവനക്കാരുടെ എണ്ണം ഇരട്ടിയാക്കി വർധിപ്പിക്കാനും പദ്ധതിയിടുന്നുണ്ട്. 19 വ്യവസായ മേഖലകളിലുള്ള കമ്പനികൾക്ക് ഇത് സഹായകരമായേക്കും. വിവിധ മേഖലകളിൽ ആയി ആണ് കമ്പനി തുക നിക്ഷേപിക്കുന്നത്. അടുത്ത മൂന്ന് വർഷങ്ങളിലായി ആണ് നിക്ഷേപം നടത്തുക എന്ന് കമ്പനി തന്നെ വെളിപ്പെടുത്തിയെങ്കിലും സമയക്രമം പ്രഖ്യാപിച്ചിട്ടില്ല.
മൈക്രോസോഫ്റ്റും ആൽഫബെറ്റും പോലുള്ള പ്രമുഖ കമ്പനികൾ ജനറേറ്റീവ് എഐ വിവിധ തൊഴിലുകളിൽ വിപ്ലവം സൃഷ്ടിക്കുമെന്ന് പ്രതീക്ഷിക്കുന്നു. സാങ്കേതികവിദ്യയുടെ സഹായത്തോടെ ഉൽപ്പന്നങ്ങളും സേവനങ്ങളും മെച്ചപ്പെടുത്താൻ തയ്യാറെടുക്കുകയാണ് കമ്പനികൾ. ഇതിനിടയിലാണ് ആക്‌സെഞ്ചറിൻെറ തീരുമാനം .
മാർച്ചിൽ ഏകദേശം 19,000 ജീവനക്കാരെ പിരിച്ചുവിട്ടതിന് ശേഷമാണ് എഐ രംഗത്ത് കമ്പനി പുതിയ നിക്ഷേപം നടത്തും എന്ന പ്രഖ്യാപനവുമായി എത്തിയത്. ഈ രംഗത്ത് കൂടുതൽ തൊഴിൽ നിയമനങ്ങളും നടക്കുമെന്നാണ് സൂചന. ഉയർന്ന പണപ്പെരുപ്പവും വർധിച്ച പലിശ നിരക്കും കാരണം കമ്പനികൾ തൊഴിലവസരങ്ങൾ വെട്ടിക്കുറയ്ക്കുകയാണ്. മാന്ദ്യ സൂചനയാണ് ഇത് നൽകുന്നതെന്നും കമ്പനി പറയുന്നു. ബിസിനസ് സ്ഥാപനങ്ങൾക്കായുള്ള എഐ നാവിഗേറ്റർ എന്ന പേരിൽ പുതിയ ഒരു ടൂളും ആക്‌സെഞ്ചർ പുറത്തിറക്കി. ആർട്ടിഫിഷ്യൽ ഇൻറലിജൻസ് എങ്ങനെ മികച്ച രീതിയിൽ ഉപയോഗിക്കാമെന്ന് ബിസിനസുകാരെ പഠിപ്പിക്കുകയാണ് ലക്ഷ്യം.
മറ്റൊരു ഐടി കൺസൾട്ടൻസി കമ്പനിയായ കാപ് ജെമിനി, ഗൂഗിൾ ക്ലൗഡുമായി ചേർന്ന് ജനറേറ്റീവ് എഐയ്‌ക്കായി ഒരു മികവിൻെറ കേന്ദ്രം സ്ഥാപിക്കുമെന്ന് പ്രഖ്യാപിച്ചു. ഇടപാടുകാർക്ക് മികവുറ്റ സേവനം നൽകുന്നതിന് എഐ പ്രോത്സാഹിപ്പിക്കുകയാണ് ലക്ഷ്യം.
Post your comments