ഉപഭോക്താകൾക്ക് പണി കൊടുത് പിഎൻബിയും ബാങ്ക് ഓഫ് ബറോഡയും

   

റിസർവ് ബാങ്ക് പലിശ നിരക്ക് വർദ്ധിപ്പിച്ചതിനെത്തുടർന്ന് മുൻനിര പൊതുമേഖലാ ബാങ്കായ പഞ്ചാബ് നാഷണൽ ബാങ്കും (പിഎൻബി) ബാങ്ക് ഓഫ് ബറോഡയും (ബിഒബി) വായ്പാ നിരക്ക് 25 ബേസിസ് പോയിന്റ് വരെ ഉയർത്തി. വ്യാഴാഴ്ച മുതൽ പ്രാബല്യത്തിൽ വന്ന റിപ്പോ ലിങ്ക്ഡ് ലെൻഡിംഗ് റേറ്റ് (ആർഎൽഎൽആർ) 8.75 ശതമാനത്തിൽ നിന്ന് 9 ശതമാനമായി അഥവാ 25 ബേസിസ് പോയിന്റ് വർദ്ധന വരുത്തിയതായി പിഎൻബി റെഗുലേറ്ററി ഫയലിംഗിൽ അറിയിച്ചു. അടിസ്ഥാന പണപ്പെരുപ്പം ഉയരുന്നത് ചൂണ്ടിക്കാട്ടി റിസർവ് ബാങ്ക് ബുധനാഴ്ച ബെഞ്ച്മാർക്ക് പോളിസി നിരക്ക് 25 ബേസിസ് പോയിന്റ് വർധിപ്പിച്ച് 6.5 ശതമാനമാക്കിയിരുന്നു. കഴിഞ്ഞ വർഷം മെയ് മുതൽ റിസർവ് ബാങ്ക് ഓഫ് ഇന്ത്യ ആറാം തവണയാണ് ഇപ്പോൾ പലിശ നിരക്ക് വർധിപ്പിക്കുന്നത്. മെയ് മുതിൽ ഇതുവരെ മൊത്തം 250 ബേസിസ് പോയിന്റ് വർധിച്ചിട്ടുണ്ട്.

മറ്റൊരും പൊതുമേഖലാ ബാങ്ക് ആയ ബാങ്ക് ഓഫ് ബറോഡ അതിന്റെ മാർജിനൽ കോസ്റ്റ് ഓഫ് ഫണ്ട് ബേസ്ഡ് ലെൻഡിംഗ് റേറ്റ് (എംസിഎൽആർ) എല്ലാ കാലാവധികളിലും 5 ബേസിസ് പോയിൻറ് വർദ്ധിപ്പിച്ചതായി അറിയിച്ചിട്ടുണ്ട്. ഫെബ്രുവരി 12 മുതൽ പുതിയ നിരക്കുകൾ പ്രാബല്യത്തിൽ വരുമെന്ന് ബാങ്ക് ഓഫ് ബറോഡ റെഗുലേറ്ററി ഫയലിംഗിൽ അറിയിച്ചു. ഏറ്റവും പുതിയ പരിഷ്ക്കരണത്തിന് ശേഷം, അതിന്റെ എംസിഎൽആർ നിരക്ക് ഒറ്റരാത്രികൊണ്ട് 7.85 ശതമാനത്തിൽ നിന്ന് 7.90 ശതമാനമായി ഉയർന്നു. ഒരു മാസത്തേക്കുള്ള എംസിഎൽആർ 8.15 ശതമാനത്തിൽ നിന്ന് 8.20 ശതമാനമായി ഉയർത്തി. മൂന്ന് മാസത്തെ എംസിഎൽആർ 8.25 ശതമാനത്തിൽ നിന്ന് 8.30 ശതമാനമായി ഉയർന്നപ്പോൾ, ഒരു വർഷത്തെ കാലാവധി 8.5 ശതമാനത്തിൽ നിന്ന് 8.55 ശതമാനമായി ഉയർന്നു.

റിപ്പോ ലിങ്ക്ഡ് ലോൺ റേറ്റ്, പേര് സൂചിപ്പിക്കുന്നത് പോലെ തന്നെ ആർബിഐ നിശ്ചയിച്ചിട്ടുള്ള റിപ്പോ നിരക്കുമായി ബന്ധിപ്പിച്ചിരിക്കുന്നു. കാലാകാലങ്ങളിൽ പരിഷ്കരിക്കപ്പെടുന്ന നിരക്കാണിത്. എല്ലാ ബാങ്കുകൾക്കും വ്യത്യസ്ത ആർഎൽഎൽആർ നിരക്ക് ഉണ്ട്. ബാങ്കുകൾ ആർബിഐയിൽ നിന്ന് വായ്പയെടുക്കുന്ന നിരക്കാണ് റിപ്പോ നിരക്ക്. ആർബിഐയിൽ നിന്ന് ബാങ്കുകൾ വായ്പയെടുക്കുന്നത് റിപ്പോ നിരക്കിലാണ്. ആർബിഐ റിപ്പോ നിരക്ക് കുറച്ചാൽ ബാങ്കുകൾ കുറഞ്ഞ നിരക്കിൽ വായ്പ നൽകുന്നു. അതിനാൽ, റിപ്പോ നിരക്ക് അടിസ്ഥാനമാക്കിയുള്ള വായ്പയുടെ കാര്യത്തിൽ, റിപ്പോ നിരക്കിലെ മാറ്റത്തിനനുസരിച്ച് ഭവന വായ്പ പലിശ നിരക്ക് കൂടുകയോ കുറയുകയോ ചെയ്യും.

എംസിഎൽആർ നിരക്ക് ഒരു ധനകാര്യ സ്ഥാപനത്തിന്റെ ആന്തരിക മാനദണ്ഡങ്ങൾക്ക് വിധേയമാണ്. മാർജിനൽ കോസ്റ്റ് അധിഷ്ഠിത വായ്പാ നിരക്ക് ഏറ്റവും കുറഞ്ഞ ഭവനവായ്പ പലിശ നിരക്ക് നിർണ്ണയിക്കാൻ ഉപയോഗിക്കുന്ന ഘടകമാണ്. എംസിഎൽആർ ബാങ്കുകളുടെ റിപ്പോ നിരക്കുമായും ഫണ്ട് ചെലവുകളുമായും ബന്ധപ്പെട്ടിരിക്കുന്നു. അതിനാൽ, റിപ്പോ നിരക്കിൽ മാറ്റമുണ്ടെങ്കിൽ, അത് ഭവന വായ്പയുടെ ഫ്ലോട്ടിംഗ് പലിശ നിരക്കിൽ സ്വാധീനം ചെലുത്തും.