ഫെയ്സ്ബുക്കിന് ശേഷം മീഷോയിൽ നിക്ഷേപത്തിന് ഒരുങ്ങി ഗൂഗിളും

 

ഇന്ത്യൻ ഇ- കൊമേഴ്‌സ് മേഖലയിലെ താരതമ്യേന പുതുമുഖങ്ങളായ മീഷോയിൽ വൻ നിക്ഷേപമെത്തുന്നു. ടെക് ഭീമനായ സാക്ഷാൽ ഗൂഗിൾ തന്നെയാണു പുതിയ നിക്ഷേപ ചർച്ചകൾ സജീവമാക്കിയിരിക്കുന്നത്. വളരെ കുറഞ്ഞ സമയംകൊണ്ട് ഇന്ത്യൻ വിപണിയിൽ മീഷോ കൈവരിച്ച വളർച്ച തന്നെയാണ് ടെക് ഭീമൻമാരേയും ആകർഷിച്ചതെന്നതിൽ സംശയമില്ല. ഏകദേശം 500 കോടി രൂപയുടെ നിക്ഷേപത്തിനാണു സാധ്യതയെന്ന് അടുത്തവൃത്തങ്ങൾ നൽകുന്ന സൂചന. ഗൂഗിളിന്റെ നിക്ഷേപത്തോടെ മീഷോയുടെ ആസ്തി 490 കോടി ഡോളറിലേക്ക് ഉയരുമെന്നാണു വിലയിരുത്തൽ. മൂലധനവും പ്രവർത്തനവും വ്യാപിപ്പിക്കുന്നതിന്റെ ഭാഗമായാണ് നിക്ഷേപം സമാഹരിക്കുന്നത്.

'ശരിയായ വില പറ' എന്ന പേരിൽ മീഷോ അടുത്തിടെ പുറത്തിറക്കിയ പരസ്യം വിപണിയിൽ വൻതരംഗം സൃഷ്ടിച്ചിരുന്നു. കുറഞ്ഞ ചെലവിൽ മികച്ച ഉൽപ്പന്നങ്ങൾ ഉപയോക്താക്കളിലെത്തിക്കാൻ സാധിക്കുന്നതു തന്നെയാണു മീഷോയുടെ വിജയ രഹസ്യം. തുണിത്തരങ്ങൾക്കായാണ് മീഷോയെ യുവതി യുവാക്കൾ ഏറ്റവും കൂടുതൽ ആശ്രയിക്കുന്നത്. 13 ലക്ഷത്തോളം വ്യക്തിഗത സംരംഭകരെ ഇ- കാമേഴ്സ് പ്ലാറ്റ്ഫോമിൽ അണിനിരത്താൻ മീഷോക്ക് സാധിച്ചിട്ടുണ്ട്. 10 കോടി ചെറുകിട ബിസിനസുകളെ ഉൾപ്പെടുത്തി ഒരൊറ്റ ഡിജിറ്റൽ പ്ലാറ്റ്ഫോം സാധ്യമാക്കുകയെന്ന ലക്ഷ്യത്തോടെ ഡൽഹി ഐ.ഐ.ടി. ബിരുദധാരികളായ വിദിത് ആത്രെയും സഞ്ജീവ് ബർൺവാളും ചേർന്നു 2015ൽ തുടക്കമിട്ട സ്റ്റാർട്ടപ്പാണ് മീഷോ. ബംഗളുരുവാണ് ആസ്ഥാനം.

ഫെയ്‌സ്ബുക്ക്, സോഫ്റ്റ്ബാങ്ക്, സെക്വേയ ക്യാപിറ്റൽ തുടങ്ങിയ സ്ഥാപനങ്ങൾ ഇതിനകം മീഷോയിൽ നിക്ഷേപം നടത്തിയിട്ടുണ്ട്. ഏപ്രിലിൽ 2,200 കോടിയിലേറെ രൂപ സമാഹരിച്ച മീഷോയുടെ നിലവിലെ മൂല്യം 210 കോടി ഡോളറാണ്. ഇന്ത്യയിലെ ഒട്ടുമിക്ക എല്ലാ സ്ഥലങ്ങളിലും ഉൽപ്പന്നങ്ങൾ എത്തിക്കാൻ മീഷോയ്ക്കു സാധിക്കുന്നുണ്ട്. ഫ്‌ളിപ്കാർട്ടും, ആമസോണും കൊടിക്കുത്തി വാഴുന്ന ഇ- കൊമേഴസ് വിപണിയിൽ തങ്ങളുടേതായ സ്ഥാനം കണ്ടെത്താൻ സാധിച്ചെന്നതാണു മീഷോയുടെ വിജയം. ഇന്ത്യയിൽ 1000 കോടി ഡോളറിന്റെ നിക്ഷേപം നടത്തുമെന്നു ഗൂഗിൾ നേരത്തേ വ്യക്തമാക്കിയിരുന്നു. ഇതിന്റെ ഭാഗമായാണു മീഷോയിലെ നിക്ഷേപവും. ഡെയ്ലിഹണ്ട്, ഗ്ലാൻസ് തുടങ്ങിയ ഇന്ത്യൻ സ്റ്റാർട്ടപ്പുകളിലും കമ്പനി നിക്ഷേപം നടത്തിയിട്ടുണ്ട്.

പുതിയ നിക്ഷേപമെത്തുന്നതോടെ വൻ ഓഫറുകൾ പ്രഖ്യാപിക്കാൻ മീഷോയ്ക്കു സാധിക്കുമെന്നാണു വിലയിരുത്തൽ. കൂടുതൽ തൊഴിലവസരങ്ങൾ സൃഷ്ടിക്കാനും നിക്ഷേപം വഴിവയ്ക്കും. നിലവിൽ 750ൽ അധികം പേർക്ക് മീഷോ തൊഴിൽ നൽകുന്നുണ്ട്. മീഷോയുടെ ഭാഗമായി ആളുകൾക്കു വാട്‌സ്ആപ്പ്, ഫെയ്‌സ്ബുക്ക്, ഇൻസ്റ്റഗ്രാം തുടങ്ങിയ പ്ലാറ്റ്‌ഫോമുകൾ വഴി ചില്ലറ വിൽപ്പന നടത്താനും സാധിക്കും.