ചൈനീസ് കമ്പനിയായ ഷവോമി ഇന്ന് ഇന്ത്യക്കാര്‍ക്ക് ഏറെ പ്രിയപ്പെട്ടവയില്‍ ഒന്നാണ്. ചൈനാ വിരുദ്ധ വികാരം ആളിക്കത്തിയപ്പോള്‍ പോലും ഷവോമിയോടുള്ള ഇന്ത്യക്കാരുടെ പ്രേമത്തിന് വലിയ കുറവൊന്നും സംഭവിച്ചില്ല എന്നത് ചരിത്രവും ആണ്. ഏറ്റവും കുറഞ്ഞ വിലയില്‍ ഏറ്റവും മികച്ചതും നൂതവനുമായ സാങ്കേതിക വിദ്യകള്‍ അവതരിപ്പിക്കുന്നു എന്നതാണ് ഷവോമിയുടെ പ്രത്യേകത.
റോബോട്ടിക്‌സ് മേഖലയില്‍ സാന്നിധ്യമുറപ്പിക്കുന്നതിൻെറ ഭാഗമായി പുതിയ ഉല്‍പ്പന്നാം പ്രഖ്യാപിചിരികുവണ് ഷാവോമി. ആര്‍ട്ടിഫിഷ്യല്‍ ഇൻ്റലിജന്‍സില്‍ പ്രവര്‍ത്തിക്കുന്ന പട്ടിയെയാണ് കമ്പനി മുന്നോട്ടുവയ്ക്കുന്നത്. വെറും ഒരു കളിപ്പാട്ടമല്ല ഈ പട്ടി. ഷാവോമി സൈബര്‍ ഡോഗ് എന്നു പേരിട്ടിരിക്കുന്ന ഉല്‍പ്പന്നത്തിനു കരുത്തു പകരുന്നത് ലോകോത്തര ഗ്രാഫിക്‌സ് കാര്‍ഡ് നിര്‍മാണ കമ്പനിയായ എന്‍വിഡിയ ആണ്. 32 എന്‍.എം. ടോര്‍ക്കും 220 ആര്‍.പി.എം. ഭ്രമണ ശേഷിയും ഈ റേബോട്ട് പട്ടി ഉല്‍പ്പാദിപ്പിക്കും. മണിക്കൂറില്‍ 11 കിലോമീറ്റര്‍ വേഗത്തില്‍ ഓടാനും തലകുത്തി മറയാന്‍ എല്ലാം ഷാവോമിയുടെ പട്ടിക്കാകും. അതായത് ജീവനുള്ള പട്ടികള്‍ക്ക് വെല്ലുവിളിയാകുമെന്നു സാരം.
കാഴ്ചയ്ക്കായി മികച്ച ക്യാമറകള്‍, ചുറ്റുപാടും നിരീക്ഷിക്കാന്‍ സെന്‍സറുകള്‍, ഇൻ്റലിൻെറ റിയല്‍ സെന്‍സ് ഡി450 ഡെപ്ത് സിസ്റ്റം, റൂം മാപ്പിങ്, ലൊക്കേഷന്‍ സെന്‍സറുകള്‍ എന്നിവയും പട്ടിയിലുണ്ട്. ലോകത്ത് ആദ്യമായിട്ടല്ല റോബോട്ടിക് പട്ടികള്‍ അവതരിപ്പിക്കപ്പെടുന്നത്. 1999ല്‍ സോണി 'ഐബോ' എന്ന പേരില്‍ റോബോട്ടിക് പട്ടികളെ പുറത്തിറക്കിയിരുന്നു. 2006 വരെ ഇവ വിപണിയിലുണ്ടായിരുന്നു. എന്നാല്‍ ഷാവോമിയുടെ പട്ടിയുടെ അത്രയും പ്രകടനം ഇവയ്ക്കുണ്ടായിരുന്നില്ല. ഷവോമിയുടെ ഫ്ളാഗ്ഷിപ് ഫോണായ എം.ഐ. മാക്സ് 4 അവതരണവേളയിലാണ് പുതിയ പദ്ധതിയെപ്പറ്റി കമ്പനി വ്യക്തമാക്കിയത്. ടെക് ലോകം വളരെ ആകാംക്ഷയോടെ കാത്തിരിക്കുകയാണ് ഷാവോമിയുടെ പട്ടിക്കായി.
ഷവോമി സ്മാര്‍ട്ട്ഡോഗ് ഒരു ഓപ്പണ്‍ സോഴ്സ് പ്രൊജക്ട് ആണ് എന്ന പ്രത്യേകതയും ഉണ്ട്. റോബോട്ടിൻെറ ഭാവി വികസനങ്ങളും നവീകരണങ്ങളും എല്ലാം ഇത്തരത്തില്‍ തന്നെ ആയിരിക്കും. മിക്ക രാജ്യങ്ങളിലും വളര്‍ത്തുമൃഗങ്ങള്‍ക്ക് വലിയ പരിമിതയാണുള്ളത്. വളര്‍ത്തുമൃഗങ്ങളുമായി ഇടപഴകുമ്പോള്‍ ഉണ്ടാകുന്ന അപകടങ്ങളും വര്‍ധിക്കുകയാണ്. ഈ സാഹചര്യത്തില്‍ ഷാവോമിയുടെ പട്ടികള്‍ക്ക് വലിയ മുന്‍തൂക്കം ലഭിക്കുമെന്നാണു വിലയിരുത്തല്‍. കമാൻ്റുകള്‍ പ്രീ ലോഡ് ചെയ്തുവരുന്ന പട്ടിയില്‍ കൂടുതല്‍ കമാൻ്റുകള്‍ കൂട്ടിചേര്‍ക്കാന്‍ ഉപയോക്താവിനാകുമെന്നാണു വിലയിരുത്തല്‍.
മൂന്ന് യു.എസ്.ബി. സി പോര്‍ട്ടുകളും ഒരു എച്ച്.ഡി.എം.ഐ. പോര്‍ട്ടും പട്ടിയിലുണ്ടാകും. സോഫ്റ്റ്‌വേര്‍ അപ്ഡേഷന്‍ പോലുള്ള കാര്യങ്ങള്‍ക്കായാണ് ഇത്. സൈബര്‍ ഡോഗ് എന്ന് വിപണിയില്‍ വില്‍പ്പനയ്‌ക്കെത്തുമെന്നു കമ്പനി വ്യക്തമാക്കിയിട്ടില്ല. അതേസമയം ആദ്യത്തെ 1,000 സൈബര്‍ഡോഗുകളെ ഡെവലപ്പര്‍മാര്‍ക്കും എന്‍ജിനീയര്‍മാര്‍ക്കും സമ്മാനമായി കൊടുക്കുമെന്നു കമ്പനി വ്യക്തമാക്കി. എന്നാല്‍ ഇത് സൗജന്യമായല്ല. ഒരു യൂണിറ്റിന് ഏകദേശം 1.1 ലക്ഷം രൂപ വിലവരും.
ഓമന മൃഗങ്ങളെ ഇഷ്ടമില്ലാത്തവര്‍ വളരെ കുറവായിരിക്കും. എന്തായാലും ഷവോമി പുറത്തിറക്കുന്ന ഈ സൈബര്‍ ഡോഗ് ഒരു 'യന്ത്ര ഓമന മൃഗം' ആണ്.
Post your comments