യൂസ് ആൻഡ് ത്രോ ചെരുപ്പുകളുമായി ഖാദി ബോർഡ്; ഇനി ഇതാണ് ട്രെൻഡ്

 

യൂസ് ആൻഡ് ത്രോ കടലാസ് ചെരുപ്പുകളുമായി ഖാദി ആൻറ് വില്ലേജ് ഇൻഡസ്ട്രീസ് കമ്മീഷൻ. 50 രൂപ വിലയിലാണ് പേപ്പര്‍ ചെരുപ്പുകൾ വിപണിയിൽ എത്തിച്ചിരിക്കുന്നത്. ആശുപത്രികളിലും ആരാധനാലയങ്ങളിലും ഓഫീസുകളിലും ഒക്കെ ഈ പേപ്പര്‍ ചെരുപ്പ് ഉപയോഗിക്കാം. 100 ശതമാനം എക്കോ ഫ്രണ്ട്ലി ഉത്പന്നമാണിത്. മരങ്ങൾ നശിപ്പിക്കാതെ തന്നെ പരുത്തി, നാരുകൾ, മറ്റ് പാഴ് വസ്തുക്കൾ എന്നിവയിൽ നിന്നാണ് ചെരുപ്പ് നിര്‍മിക്കുന്നത്. രാജ്യാന്തര വിപണി കൂടി ലക്ഷ്യമിട്ടാണ് ഈ പ്രകൃതി സൗഹാർദ ചെരിപ്പ് പുറത്തിറക്കിയിരിക്കുന്നത്.

ഖാദിയുടെ കുഞ്ഞുങ്ങൾക്കായുള്ള പരുത്തി വസ്ത്രങ്ങളും വിപണിയിൽ എത്തിയിട്ടുണ്ട്.
കേന്ദ്രമന്ത്രി നാരായണ റാണെയാണ് ഖാദിയുടെ ഉൽപ്പന്നങ്ങൾ വിപണിയിൽ അവതരിപ്പിച്ചത് ഖാദി കോട്ടൺ ബേബിവെയർ, പേപ്പർ സ്ലിപ്പറുകൾ എന്നിവ കൂടാതെ ബേബി നാപ്കിൻ ഉൾപ്പെടെ പുറത്തിറക്കിയിട്ടുണ്ട്.

ഓൺലൈനിലൂടെയും ഉത്പന്നങ്ങൾ വാങ്ങാം. ഇന്ത്യയിൽ ആദ്യമായാണ് യൂസ് ആൻഡ് ത്രോ ചെരുപ്പുകൾ വിപണിയിൽ എത്തുന്നത്. കുഞ്ഞുങ്ങൾ‌ക്കുള്ള കോട്ടൺ‌ വസ്ത്രങ്ങളിൽ സ്ലീവ്‌ലെസ് ഷർട്ടുകളും ഫ്രോക്കുകളും ഒക്കെയുണ്ട്.

രണ്ട് വയസ്സ് വരെ പ്രായമുള്ള കുഞ്ഞുങ്ങൾക്കായുള്ള ഉത്പന്നങ്ങൾ ലഭ്യമാണ് . കുട്ടികളുടെ മൃദുവായ ചർമ്മത്തിന് ഏറ്റവും അനുയോജ്യമായ വസ്ത്രങ്ങളാണ് പുറത്തിറക്കിയിരിക്കുന്നത് . പൂര്‍ണാമായും കൈകൊണ്ട് നെയ്ത കോട്ടൺ വസ്ത്രങ്ങൾ ആണിവ. എംഎസ്എംഇ മന്ത്രാലയത്തിൻെറ നേതൃത്വത്തിലാണ് ഉത്പന്നങ്ങൾ പുറത്തിറക്കിയത്. 600 രൂപ മുതലാണ് കുഞ്ഞുടുപ്പുകൾക്ക് വില.