6ജി; ആദ്യമാര്? യൂഎസോ ചൈനയോ ?

 

5ജി എല്ലാ മേഖലകളിലേക്കും വ്യാപിപ്പിക്കാനും 6ജി വേഗത്തിലാക്കാനും തയ്യാറെടുക്കുകയാണ് ചൈന. 5ജി അധിഷ്ഠിത വ്യാവസായിക ഇൻർനെറ്റിൻെറ നിർമ്മാണം വേഗത്തിലാക്കാനും 5ജി ആപ്ലിക്കേഷൻ വിപുലീകരിക്കാനുമുള്ള പദ്ധതികൾ തുടങ്ങിയതായി രാജ്യം നേരത്തെ തന്നെ വ്യക്തമാക്കിയിരുന്നു. 6ജി ഗവേഷണവും വികസന പ്രക്രിയകളും തുടങ്ങിക്കഴിഞ്ഞെന്ന് പ്രഖ്യാപിച്ചിരിക്കുകയാണ് രാജ്യം. ഇതിനായുള്ള ഗവേഷണങ്ങളിൽ നിക്ഷേപം വർദ്ധിപ്പിക്കുന്നതിനും ആർട്ടിഫിഷ്യൽ ഇൻറലിജൻസ്, ബ്ലോക്ക്ചെയിൻ, ക്ലൗഡ് കമ്പ്യൂട്ടിംഗ് തുടങ്ങിയ മേഖലകളിലെ വികസനം വേഗത്തിലാക്കാനും സംരംഭങ്ങൾക്ക് പിന്തുണയും സർക്കാർ നൽകുന്നുണ്ട്. ഈ സാഹചര്യത്തിൽ 6ജി വേഗത്തിലാക്കാൻ തയ്യാറെടുക്കുകയാണ് യുഎസും.

6G നെറ്റ്‌വർക്കുകളുടെ വിന്യാസത്തിനുള്ള പദ്ധതികൾ വികസിപ്പിക്കുകയാണിപ്പോൾ. ടെലികമ്മ്യൂണിക്കേഷൻ വ്യവസായത്തിൽ ചൈനയുടെ മുന്നേറ്റത്തെക്കുറിച്ചുള്ള ആശങ്കകൾക്കിടയിലാണ് യുഎസും പദ്ധതികൾ പ്രഖ്യാപിച്ചത്. 6G നെറ്റ്‌വർക്ക് പ്രവർത്തനക്ഷമമാക്കുന്നതിനുള്ള പദ്ധതികൾക്കായി ചർച്ചകൾ നടക്കുന്നുണ്ട്. 6ജി വികസിപ്പിക്കാൻ 5ജിയിൽ നിന്ന് പഠിച്ച പാഠങ്ങൾ സഹായകരമായേക്കും. ലോകത്തിലെ ആദ്യത്തെ 6ജി ഉപഗ്രഹം ചൈന വിജയകരമായി വിക്ഷേപിച്ചിരുന്നു. ബഹിരാകാശത്ത് 6ജി ഫ്രീക്വൻസി സ്പെക്ട്രത്തിൻെറ പ്രകടനം പരിശോധിക്കുന്നതിനായി 2020 അവസാനത്തോടെയാണ് ചൈന ഉപഗ്രഹം വിക്ഷേപിച്ചത്.

ചൈന ഇപ്പോൾ 5ജി നിലവാരത്തിൽ മുന്നിലാണ്. കൂടാതെ 4,100-ലധികം മൊബൈൽ ടെക്നോളജി പേറ്റൻറുകൾക്കായി അപേക്ഷിച്ചിട്ടുമുണ്ട്. കൽക്കരി ഖനനം, തുറമുഖ മാനേജുമെൻറ്, നിർമ്മാണം തുടങ്ങി നിരവധി വ്യവസായ മേഖലകളിൽ ചൈന ഈ വർഷം 5ജി ഉപയോഗം പ്രോത്സാഹിപ്പിക്കുകയാണ്.. ലോകത്തിലെ ഏറ്റവും കൂടുതൽ 5ജി സ്റ്റേഷനുകൾ മാത്രമല്ല വരിക്കാരും ചൈനയിൽ തന്നെയാണ്.

2030-ഓടെ ഇന്ത്യയിൽ 6ജി വികസിപ്പിക്കുന്നതിനായി ഇന്ത്യയും പദ്ധതി പ്രഖ്യാപിച്ചിട്ടുണ്ട്. രാജ്യത്ത് അടുത്ത തലമുറയിലെ ടെലികോം സാങ്കേതികവിദ്യയുടെ ഗവേഷണത്തിനും വിന്യാസത്തിനുമായി പണം കണ്ടെത്തുന്നതിനും ധനസഹായം നൽകുന്നതിനുമായി ഭാരത് 6ജി പദ്ധതി രൂപീകരിച്ചിരുന്നു. ഇന്ത്യയുടെ 6ജി പദ്ധതി രണ്ട് ഘട്ടങ്ങളിലായി നടപ്പിലാക്കാൻ ആണ് ലക്ഷ്യമിടുന്നത്. പദ്ധതിയ്ക്ക് മേൽനോട്ടം വഹിക്കാനും 6ജി ഉപയോഗത്തിനുള്ള സ്പെക്‌ട്രം , ഉപകരണങ്ങൾക്കായുള്ള സാഹചര്യങ്ങൾ സൃഷ്ടിക്കൽ, തുടങ്ങിയ വിഷയങ്ങളിൽ ശ്രദ്ധ കേന്ദ്രീകരിക്കാനും സർക്കാർ പ്രത്യേക കൗൺസിലിനെ നിയമിച്ചിട്ടുണ്ട്.