കാത്തിരിപ്പിന് ശേഷം ഒടുവിൽ ബിഎസ്എൻഎൽ 4ജി സേവനങ്ങൾ എത്തുന്നു. ടിസിഎസിൻെറ സഹായത്തോടെ ഒരു ലക്ഷം 4ജി ടവറുകൾ സ്ഥാപിക്കാൻ ബിഎസ്എൻഎലിന് സർക്കാർ അനുമതി. ടവറുകൾ സ്ഥാപിക്കാൻ ഒരു ലക്ഷം സൈറ്റുകൾ സ്ഥാപിക്കാൻ ടാറ്റ കൺസൾട്ടൻസി സർവീസസിൻെറ (ടിസിഎസ്) നേതൃത്വത്തിലുള്ള കൺസോർഷ്യത്തോട് ബിഎസ്എൻഎൽ ബോർഡ് ശുപാർശ ചെയ്തിട്ടുണ്ട്. ഇത് സംബന്ധിച്ച വിവരങ്ങൾ ടെലികോം കമ്പനി ഉടൻ തന്നെ ടെലികോം ഡിപ്പാർട്ട്‌മെൻറിന് കൈമാറും. മാർച്ച് ആദ്യത്തോടെ പർച്ചേസ് ഓർഡർ നൽകുന്നതിനുള്ള സർക്കാർ അനുമതിക്കായി ശ്രമിച്ചേക്കുമെന്ന് റിപ്പോർട്ടുകൾ സൂചിപ്പിക്കുന്നു. ബിഎസ്എൻഎല്ലിൻെറ 4G നെറ്റ്‌വർക്ക് വിപുലീകരിക്കുന്നതിനായുള്ള നടപടികൾ വേഗത്തിലാക്കാൻ ടെലികോം മന്ത്രി അശ്വിനി വൈഷ്ണവിന്റെ അധ്യക്ഷതയിൽ കഴിഞ്ഞ ആഴ്‌ച നടന്ന യോഗത്തിൽ തീരുമാനമായിരുന്നു. ഇതേ തുടർന്നാണ് നടപടികൾ.
10 വർഷത്തെ വാർഷിക മെയിൻറനൻസ് കരാ‌റോടെ ഏകദേശം 13,000 കോടി രൂപ ചെലവ് വരുന്ന നെറ്റ്‌വർക്ക് ആണ് വികസിപ്പിക്കുന്നത്. ഇതിനായി മൊത്തം 24556.37 കോടി രൂപയ്ക്കാണ് ടിസിഎസിന് കരാർ നൽകുന്നത്. ടി.സി.എസ്. സൈറ്റുകൾക്ക് 4G ഉപകരണങ്ങൾ നൽകും. ടാറ്റ കൺസൾട്ടൻസി സർവീസസും സർക്കാരിൻെറ ഉടമസ്ഥതയിലുള്ള ഐറ്റിഐ ലിമിറ്റഡും കഴിഞ്ഞ വർഷം നവംബറിൽ ബിഎസ്എൻഎൽ 4ജി നെറ്റ്‌വർക്ക് വിന്യസിക്കുന്നതിന് കരാർ സമർപ്പിച്ചിരുന്നു. നാല് സോണുകളിലായി 4ജി വിന്യസിക്കുന്നതിനായിരുന്നു കരാർ.
നെറ്റ്‌വർക്ക് പുതുക്കുന്നതിൽ ഐടിഐക്ക് 20 ശതമാനം സംവരണം ഉണ്ടെങ്കിലും ടിസിഎസിൻെറ നേതൃത്വത്തിലുള്ള കൺസോർഷ്യം നൽകുന്ന ഹാർഡ്‌വെയർ ഉപയോഗിക്കാൻ ആണ് നിർദേശം . ഇതിൽ സ്വകാര്യ കമ്പനിയായ സെൻറർ ഫോർ ഡെവലപ്‌മെൻറ് ഓഫ് ടെലിമാറ്റിക്‌സിൻെറ (C-DoT) കോർ നെറ്റ്‌വർക്ക് ഹാർഡ്‌വെയറും ഉൾപ്പെടും. ചണ്ഡീഗഡിൽ ബിഎസ്എൻഎൽ ആദ്യ 4ജി സേവനം ആരംഭിച്ചേക്കുമെന്ന് റിപ്പോർട്ടുകൾ ഉണ്ടായിരുന്നു. 4ജി സേവനങ്ങൾ ഇന്ത്യ മുഴുവൻ ലഭിക്കാൻ ഒരു വർഷത്തിലേറെ എടുത്തേക്കും. അതേസമയം സർക്കാർ ഉടമസ്ഥതയിൽ ഉള്ള ബിഎസ്എൻഎലിൻെറ അതിവേഗ ബ്രോഡ്‌ബാൻഡ് കണക്ഷൻ എല്ലാ ഗ്രാമങ്ങളിലും നടപ്പാക്കാൻ ടെലികോം വകുപ്പ് ശ്രമിക്കുന്നുണ്ട്.ഗ്രാമീണ മേഖലകളിൽ ഒപ്റ്റിക്കൽ ഫൈബർ ശൃംഖല നിർമ്മിക്കാൻ ശ്രമിക്കുന്ന ഭാരത് നെറ്റ് പ്രോഗ്രാമിൻെറ ഭാഗമായി രാജ്യത്തെ ഏകദേശം 1.9 ലക്ഷം ഗ്രാമങ്ങളിലേക്ക് ടെലികോം സേവനങ്ങൾ എത്തിക്കാനായിട്ടുണ്ട്. ഈ വർഷം പകുതിയോടെ 2.2 ലക്ഷം ഗ്രാമങ്ങളിലേക്കും സേവനം എത്തിക്കും എന്നാണ് സൂചന
Post your comments