ഇന്ത്യൻ വാഹനവിപണിയിൽ തളർച്ച

റിസർവ്വ് ബാങ്ക് പലിശനിരക്ക് വർധിപ്പിച്ചതും, തേർഡ് പാർട്ടി ഇൻഷുറൻസ് പ്രീമിയത്തിലുണ്ടായ വർധനയും വാഹനവിപണിയെ പ്രതികൂലമായി ബാധിക്കുമെന്ന് ആശങ്ക. ഇയർ ഓൺ ഇയർ അടിസ്ഥാനത്തിൽ എല്ലാവിഭാഗം വാഹനങ്ങളും മെയ് മാസത്തിൽ വളർച്ച നേടിയിരുന്നു. അതേസമയം 2021 മെയ് മാസത്തിൽ കോവി‍ഡിന്റെ രണ്ടാം തരംഗത്തെ തുടർന്ന് വാഹന മേഖല തകർന്നടിഞ്ഞിരുന്നു. 2022 മെയ് മാസത്തിൽ ഇരുചക്ര വാഹനങ്ങൾ 1,253,187 യൂണിറ്റുകളും, മുച്ചക്ര വാഹനങ്ങൾ 28, 452 യൂണിറ്റുകളുമാണ് വിറ്റത്. മുൻവർഷത്തെ അപേക്ഷിച്ച് വളർച്ചയുണ്ടെങ്കിലും കോവിഡിനു മുന്നെയുള്ള 2019 മെയ് മാസവുമായി താരതമ്യം ചെയ്യുമ്പോൾ ഇരുചക്ര വാഹനങ്ങളുടെ വില്പന 27.3 ശതമാനവും, മുച്ചക്ര വാഹനങ്ങളുടെ വില്പന 44.7 ശതമാനവുമാണ് ഇടിഞ്ഞത്. എന്നാൽ 2019 മെയ് മാസത്തെ അപേക്ഷിച്ച് കാർവില്പനയിൽ 10.6 ശതമാനത്തിന്റെ വർധനവുണ്ടായി. കോവിഡ് ഭീഷണിയെത്തുടർന്ന് ആളുകൾ സ്വകാര്യവാഹനങ്ങൾക്ക് കൂടുതൽ പ്രാധാന്യം നൽ‍കിയതും, പൊതുഗതാഗത സംവിധാനങ്ങളേക്കാൾ കംഫർട്ടിന് പ്രാധാന്യം നൽകിയതുമെല്ലാം ഇതിനു കാരണമായി.
 

സൊസൈറ്റി ഓൺ ഇന്ത്യൻ ഓട്ടോമൊബൈൽ മാനുഫാക്ചറേഴ്സിന്റെ നയപ്രകാരം ഒറിജിനൽ എക്യുപ്മെന്റ് മാനുഫാക്ചറേഴ്സ്, ഡീലേഴ്സിന് വില്പനയ്ക്കായി നൽകുന്ന വാഹനങ്ങളാണ് വില്പന നടന്നതായി കണക്കാക്കുന്നത്. ഇന്ത്യൻ വാഹനവിപണിയിൽ ഇരുചക്രവാഹനങ്ങൾക്ക് സുപ്രധാന സ്ഥാനമാണുള്ളത്. ഇരുചക്രവാഹനങ്ങൾ സ്വന്തമാക്കുന്നവർ കൂടുതൽ തുക ഇനി ചെലവാക്കണമെന്നതിനാൽ വരും മാസങ്ങളിൽ വില്പന കുറയുമെന്ന ആശങ്ക ശക്തമാണ്. വർഷങ്ങൾക്കു ശേഷം ഇരുചക്ര-മുച്ചക്ര വാഹന വിപണി ആലസ്യത്തിലേക്കു പോകുന്നതായാണ് കണക്കുകൾ കാണിക്കുന്നത്. കോവിഡ് ഭീഷണി കുറഞ്ഞെങ്കിലും പാസഞ്ചർ വാഹന വിപണിയിലെ വില്പന ഇപ്പോഴും 2018 വർഷത്തേതിനു താഴെയാണ്.

സപ്ലൈ ഉറപ്പു വരുത്താനുള്ള സർക്കാർ ശ്രമങ്ങൾ വാഹന മേഖലയ്ക്ക് സഹായകമാകുന്നുണ്ടെങ്കിലും റിസർവ് ബാങ്കിന്റെ പലിശനിരക്കുയർത്താനുള്ള തീരുമാനവും,ജൂൺ 1 മുതൽ നിലവിൽ വന്ന തേർഡ് പാർട്ടി ഇൻഷുറൻസ് വർധനയുമാണ് നിലവിലെ വെല്ലുവിളികൾ. രണ്ട് വർഷത്തെ കാലയളവിനിടയിലാണ് ഇൻഷുറൻസ് റെഗുലേറ്ററി ഡവലപ്മെന്റ് അതോറിറ്റി ഓഫ് ഇന്ത്യ ഇൻഷുറൻസ് നിരക്കുകൾ വർധിപ്പിക്കുന്നത്. ബുധനാഴ്ചയാണ് ആർബിഐ 50 ബേസിസ് പോയിന്റ് വരെ നിരക്കു വർധിപ്പിച്ചത്. 36 ദിവസത്തിനുള്ളിൽ ഇതു രണ്ടാം തവണയാണ് റിസർവ്വ് ബാങ്ക് നിരക്കു വർധിപ്പിക്കുന്നത്. കഴിഞ്ഞ മാസവും 40 ബേസിസ് പോയിന്റ് വർധന നടപ്പാക്കിയിരുന്നു.

രാജ്യാന്തര എണ്ണവില ഉയർന്നു തന്നെ നിൽക്കുന്നതിനാൽ പെട്രോൾ- ഡീലൽ വിലയിൽ വലിയ മാറ്റമില്ല. ഇന്ധനവില ഉയർന്നു നിന്നാലും സ്വകാര്യവാഹനങ്ങളിലേക്ക് ആളുകൾ തിരിയുന്ന കാഴ്ച്ചയാണ് ഇന്ത്യയിലുള്ളത്. ഇരുചക്ര വാഹനങ്ങളും, കാറുകളും ടിവിയും ഫ്രിഡ്ജും പോലെയുള്ള ഒരാവശ്യമായി വീടുകളിൽ മാറുന്ന കാഴ്ചയാണ് ഈ കഴിഞ്ഞ വർഷങ്ങളിലായുള്ളത്. ഇതിനിടെ ഇലക്ട്രിക് വാഹനങ്ങളെ പ്രോത്സാഹിപ്പിക്കാനുളള തീവ്രശ്രമവും സർക്കാർ നടത്തുന്നുണ്ട്. ഈ മേഖലയിലെ അടിസ്ഥാന സൗകര്യങ്ങൾ ഉറപ്പാവുകയും വില അല്പം കൂടി കുറയുകയും ചെയ്താൽ വലിയൊരു കുതിച്ചു ചാട്ടം ഇല്ക്ട്രിക് വാഹന വില്പനയിലുണ്ടാകുമെന്നാണ് കരുതപ്പെടുന്നത്.