ആമസോൺ പ്രൈം ഡേ വിൽപന ഈ മാസം; ഇന്ത്യയെ ഒഴിവാക്കി

ഇ-കൊമേഴ്സ് ഭീമനായ ആമസോൺ പ്രൈം ഡേ വിൽപനയുമായി എത്തുന്നു. ജൂൺ 21, 22 ദിവസങ്ങളിലാണ് ആമസോണിന്റെ പ്രൈം ഡേ സെയിൽ നടക്കുക. കൊവിഡിനിടെ ചെറുകിട ബിസിനസ് വ്യാപാരികളെ പിന്തുണയ്ക്കുന്നതിനായാണ് പ്രൈം ഡേ നടത്താൻ തീരുമാനിച്ചതെന്ന് കമ്പനി പ്രസ്താവനയിൽ പറഞ്ഞു. സാധാരണ ജൂലൈയിലാണ് ആമസോൺ പ്രൈം ഡേ നടത്താറുള്ളത്.

ആമസോൺ പ്രൈം അംഗങ്ങൾക്കായി ഫാഷൻ, ഇലക്‌ട്രോണിക്‌സ്, കളിപ്പാട്ടങ്ങൾ, ഗാർഹിക ഉത്പന്നങ്ങൾ, ഓട്ടോമോട്ടീവ് തുടങ്ങി വിഭാഗങ്ങളിൽ വൻ ഓഫർ ലഭ്യമാക്കും. പ്രൈം ഡേയിൽ വിൽപ്പനക്കാർ ഒരു കോടിയിലധികം ഡീലുകളും കൊണ്ടുവരും. അതേസമയം ഇന്ത്യ, കാനഡ എന്നീ രാജ്യങ്ങളെ പ്രൈം ഡേ സെയിലിൽനിന്ന് ഒഴിവാക്കിയിട്ടുണ്ട്. വർധിച്ചുവരുന്ന കൊവിഡ് കേസുകളാണ് ഇതിന് കാരണം. പകർച്ചവ്യാധി കാരണം ഇന്ത്യയിൽ കഴിഞ്ഞ വർഷവും പ്രൈം ഡേ നീട്ടിയിരുന്നു. ഒക്ടോബറിലായിരുന്നു പ്രൈം ഡേ നടത്തിയത്.

എന്നാൽ അടുത്ത മാസം ഒളിമ്പിക്സ് ആരംഭിക്കുന്നതിലാണ് ഇത്തവണത്തെ പ്രൈം ഡേ സെയിൽ ഒരുമാസം നേരത്തെ ആക്കിയത്. ഇതുകൂടാതെ തിരഞ്ഞെടുത്ത 20 രാജ്യങ്ങളിൽ മാത്രമാണ് ഈ രണ്ട് ദിവസങ്ങളിൽ വമ്പിച്ച ഓഫറോടുകൂടിയ വിൽപന നടത്തുക. യുഎസ്, യുകെ, യുഎഇ, തുർക്കി, സ്പെയിൻ, സിംഗപ്പൂർ, സൗദി അറേബ്യ, പോർച്ചുഗൽ, നെതർലാന്റ്സ്, മെക്സിക്കോ, ലക്സംബർഗ്, ജപ്പാൻ, ഇറ്റലി, ജർമ്മനി, ഫ്രാൻസ്, ചൈന, ബ്രസീൽ, ബെൽജിയം, ഓസ്ട്രിയ, ഓസ്ട്രേലിയ എന്നീ രാജ്യങ്ങൾ ഇതിൽ ഉൾപ്പെടും.

2015ൽ ചൈനീസ് ഇ-കൊമേഴ്‌സ് കമ്പനിയായ ആലിബാബ ജനപ്രിയമാക്കിയ സിംഗിൾസ് ഡേയ്ക്ക് സമാനമായാണ് ആമസോൺ പ്രൈം ഡേ സെയിൽ ആരംഭിച്ചത്. പ്രതിവർഷം 8,697 രൂപ അടച്ച് ഉപയോക്താക്കൾക്ക് ആമസോൺ പ്രൈം മെമ്പർഷിപ്പ് എടുക്കാം. വൻ വിലക്കുറവിൽ സാധനങ്ങൾ വാങ്ങിക്കാനും വേഗത്തിൽ വീട്ടിലെത്തിക്കാനും ആമസോൺ പ്രൈം മെമ്പർഷിപ്പ് വഴി സാധിക്കും. പ്രൈം ഡേ വിൽപനയെ തകർക്കാൻ കഴിഞ്ഞ വർഷങ്ങളിൽ വാൾമാർട്ട്, ബെസ്റ്റ് ബൈ, ടാർഗെറ്റ്, മറ്റ് റീട്ടെയിലർമാർ എന്നിവർ വൻ ഡിസ്കൗണ്ട് വിൽപനയുമായി എത്തിയിരുന്നു.